راولپنڈی: الیکشن کمیشن آف پاکستان (ای سی پی) نے بدھ کو پاکستان تحریک انصاف (پی ٹی آئی) کے بانی عمران خان اور سابق وزیر اطلاعات فواد چوہدری پر الیکشن کمیشن اور چیف الیکشن کمشنر کے خلاف توہین عدالت کے مقدمے میں فرد جرم عائد کردی۔

الیکشن کمیشن کے رکن سندھ نثار احمد درانی کی سربراہی میں چار رکنی بینچ نے اڈیالہ جیل میں کیس کی سماعت کی، جہاں دونوں رہنما قید ہیں۔

سماعت کے دوران سابق وزیراعظم اور سابق وزیر کمرہ عدالت میں موجود تھے اور چارج شیٹ میں درج الزامات کی تردید کی۔

ای سی پی نے توہین عدالت کیس کی سماعت 16 جنوری تک ملتوی کردی۔

الیکشن کمیشن نے پی ٹی آئی کے سابق چیئرمین، سابق پارٹی رہنما اسد عمر اور فواد کے خلاف مختلف جلسوں، پریس کانفرنسوں اور متعدد انٹرویوز کے دوران کمیشن اور اس کے سربراہ کی توہین کرنے پر توہین عدالت کی کارروائی شروع کی تھی۔